२२ चैत, काठमाडौं । मकवानपुरको बागमती गाउँपालिका ८ फापरबारीस्थित जनता माविका शिक्षकले छात्राहरुमाथि यौन दुर्व्यवहार गरेको भन्दै आज विद्यालयमा विद्यार्थीहरुले तोडफोड र तालाबन्दी गरेका छन् ।

विद्यालयका कक्षा ४ देखि ८ सम्म अध्ययनरत छात्राहरुले विद्यालयका तीनजना शिक्षकहरुले यौन दुर्व्‍यवहार गरेको भन्‍दै उनीहरुलाई निकाल्न माग गर्दै तोडफोड र तालाबन्दी गरेका हुन् ।

विद्यालयका तीन शिक्षकहरुले गलत नियतले छात्राहरुमाथि दुर्व्‍यवहार गरेको भन्‍दै फागुन ११ गते अभिभावकले र फागुन २० गते विद्यार्थीहरुले विद्यालय प्रशासनमा मौखिक उजुरी गरेका थिए ।

विद्यार्थीहरुले शिक्षकहरुलाई निष्कासन गर्नुपर्ने माग राखेपछि आज विद्यालय प्रशासन, व्यवस्थापन समिति, अभिभावक, विद्यार्थीको संयुक्त बैठक बोलाइएको थियो । तर बैठक बसिरहेका बेला विद्यार्थीहरु बाहिर निस्केर विद्यालयमा तोडफोड गरेको प्रधानाध्यापक राईले बताए ।

उनले भने ‘आज सबै पक्ष बैठक बसिरहेका थियौं । बैठक बस्दाबस्दै विद्यार्थीहरुले बैठकमा भएको कुराकानी चित्त नबुझेको भन्दै निस्केर भौतिक संरचना तोडफोड गर्नुका साथै तालाबन्दी गरेका छन् ।