नेपाल एयरलाइन्सको जहाज आजदेखि उड्दै
९ वैशाख, काठमाडौं । नेपाल वायुसेवा निगमले नेपालीहरुको ठूलो संख्या रहेको मुलुक साउदी अरबमाआज देखि नियमित उडान सुरु गर्ने भएको छ ।
साउदी अरबको रियादमा काठमाडौंबाट नेपाल एयरलाइन्सको जहाज आज साँझ ७ः१५ मा रियादका लागि उड्ने भएको छ । निगमले वाइडबडी जहाज किन्ने बेला गरेको बजार प्रक्षेपणमा यो गन्तव्य समेटिएको थियो ।
निगमले साउदीका विभिन्न गन्तव्य रियाद, दमाम र जेद्दामा उडानको अनुमति पाएको भएपनि पहिलो चरणमा रियादमा मात्र उडान गर्न लागेको हो । यस शहरमा निगमले साताको दुई उडान गर्ने भएको छ ।
शुक्रबार र आइतबार काठमाडौंबाट निगमको जहाज रियाद उड्ने छ । जहाज साउदीबाट भने शनिबार र सोमबार काठमाडौं फिर्ता हुनेछ ।
