वीरेन्द्रनगर नगरपालिकाको मेयर र उपमेयरमा एमाले विजयी
५ जेठ, काठमाडौं । सुर्खेतको वीरेन्द्रनगर नगरपालिकाको मेयर र उपमेयरमा नेकपा एमालेका उम्मेदवार विजयी भएका छन् । मेयरमा मोहनमाया ढकाल र उपमेयरमा नीलकण्ठ खनाल निर्वाचित भएका हुन् ।
गठबन्धनका उम्मेदवार उपेन्द्र खड्कालाई ५५४ मत अन्तरले पराजित गर्दै ढकाल मेयरमा विजयी भएकी हुन् । ढकालले १६ हजार ३८ मत ल्याउँदा उनका निकटतम प्रतिस्पर्धी नेपाली कांग्रेसका उपेन्द्र खड्काले १५ हजार ४८४ मत पाए । राष्ट्रिय प्रजातन्त्र पार्टीका मुकुन्दश्याम गिरीले १० हजार ६ मत पाएका छन् ।
उपमेयरमा विजयी खनालले २० हजार ३६४ मत पाएर विजयी भएका छन् भने उनका निकटतम प्रतिद्वन्दी माओवादी केन्द्रकी शान्ति ढकालले ११ हजार ५३३ मत पाइन् । त्यस्तै राप्रपाकी लक्ष्मीकुमारी सार्कीले ३ हजार ६९७ मत पाएकी छन् ।
