असार, १२ काठमाडौं । सिराहाको लहानमा गोली चल्दा एक जना घाइते भएका छन्।
आज बिहान पौने ९ बजे लहान नगरपालिका-२२ बेलहिजातियाहीस्थित रविन चौधरीको घरमा गोली चलेको हो। गोली एक जनाको पेटमा लागेर घाइते भएको जिल्ला प्रहरी कार्यालयका प्रहरी निरीक्षक रामचन्द्र शाहले जानकारी दिए।

१८ वर्षीय दिलिप मुखियाको पेटको नाइटोभन्दा माथि गोली लागेको हो। घाइते दिलिपको उपचारको लागि धरान पठाएको छ। उनको अवस्था गम्भीर छ।

प्रहरीले एक जना नाबालिगसहित दुई जनालाई पक्राउ समेत गरेको छ।
प्रहरीले सोही ठाउँका १९ वर्षीय सुशान्त चौधरी र १५ वर्षीय बालकलाई पक्राउ गरेको छ। सुशान्त चौधरीले गोली चलाएका थिए।

प्रहरीले घटनास्थलबाट नाम नभएको एउटा पेस्तोल, पाँच थान ७.६५ एमएमको गोली बरामद गरेको छ। सोही घर नजिकैको बाँसघारीबाट एउटा कटुवा पेस्तोल, पाँच थान त्यसमा लाग्ने गोली र थप चार थान ७.६५ एमएमको गोली बरामद गरेको छ।