चित्तलको शिकार गरेको आरोपमा आठ जना पक्राउ
साउन, २५ काठमाडौं । नेपाली सेनाले चित्तलको शिकार गरेको आरोपमा आठ जनालाई पक्राउ गरेको छ।
सुनसरीस्थित श्रीलंका टापुस्थित भागलपुरबाट आठ जनालाई पक्राउ गरेको नेपाली सेनाको जनसम्पर्क तथा सूचना निर्देशनालय, जंगी अड्डाले जानकारी दिएको छ।
बुधबार कोशीटप्पु वन्यजन्तु आरक्ष सुरक्षार्थ तैनाथ नेपाली सेना र निकुञ्जका कर्मचारीसहितको संयुक्त गस्ती टोली खटिएको थियो।
गस्ती गर्नेक्रममा श्रीलंका टापुस्थित भागलपुरबाट एक जनालाई चित्तलको मासुसहित पक्राउ गरेको थियो।
उनीमाथि सोधपुछ गरी यसमा अन्य शिकारीहरू समेतको संलग्नता रहेको खुल्यो।
सूचना पाएपछि संयुक्त गस्ती टोलीले स्थानीयवासीको घरमा खोजी गरेको थियो। त्यहाँबाट थप सात जनालाई नियन्त्रणमा लिएको हो।
