‘नेपाल नागरिकता (पहिलो संशोधन) विधेयक २०७९’ राष्ट्रिय सभाबाट आज पुनः पारित गराउने सरकारको तयारी छ।
पुनर्विचारका लागि राष्ट्रपति विद्यादेवी भण्डारीले संसदमै फिर्ता गरेको नागरिकता विधेयक प्रतिनिधि सभाबाट पुनः पारित भइसकेको छ।

अब राष्ट्रिय सभाबाट पारित भएपछि प्रमाणीकरणका लागि विधेयक पुन: राष्ट्रपतिकहाँ पठाइनेछ।
आज बस्ने राष्ट्रिय सभाको बैठकमा गृहमन्त्री बालकृष्ण खाँणले ‘नेपाल नागरिकता (पहिलो संशोधन) विधेयक २०७९’ पारित गरियोस् भन्ने प्रस्ताव गर्ने सम्भावित कार्यसूची छ।

त्यसअघि आजै उक्त विधेयकबारे विधायन व्यवस्थापन समितिको प्रतिवेदनको छलफल जारी रहनेछ। यस विषयमा सांसदले विचार राख्ने क्रम बिहीबार नसकिएकाले आज पनि छलफल जारी रहने भएको हो।

यसअघि राष्ट्रियसभाको विधायन व्यवस्थापन समितिले सरकारले प्रस्तुत गरेको ‘नेपाल नागरिकता ऐन, २०६३ संशोधन गर्न बनेको विधेयक’ बहुमतबाट पारित गरिसकेको छ।

समितिको बैठकले सरकारद्वारा प्रस्तुत सो विधेयक बिनासंशोधन बहुमतबाट पारित गरेको हो।
संघीय संसदको दुवै सदनबाट पारित सो विधेयक प्रमाणीकरणका लागि राष्ट्रपति समक्ष पठाइएकामा राष्ट्रपतिबाट साउन २९ गते आठ बुँदे सन्देशसहित प्रतिनिधिसभामा फिर्ता भएको थियो। उक्त विधेयक गत साउन ६ गते संघीय संसदका दुवै सदनबाट पारित भई प्रमाणीकरणका लागि राष्ट्रपति समक्ष पठाइएको थियो। सेतोपाटी बाट