उपत्यकाबाट लागुऔषधसहित १५ जना पक्राउ
भदौ,२१ काठमाडौं । प्रहरीले काठमाण्डौ उपत्यकाबाट लागुऔषधसहित १५ जनालाई पक्राउ गरी आज सार्वजनिक गरेको हो । लागुऔषध नियन्त्रण ब्युरो कोटेश्वरबाट खटिएको प्रहरी टोलीले उपत्यकाको विभिन्न ठाउँबाट लागुऔषधसहित पक्राउ परेकालाई आज सार्वजनिक गरेको हो ।
विभिन्न व्यक्तिले लागुऔषध एम्पुल खरिदका लागि धरौटी राखेको विभिन्न कम्पनीको मोबाइल १७, घडी सात र गितार चार थानसमेत प्रहरीले बरामद गरेको छ । भदौ १६ गतेदेखि भदौ २० गतेसम्म ब्युरोको टोलीले उपत्यकाबाट खैरो हेरोइन दुई सय ८७ ग्राम, दुई सय ५२ एम्पुल र दुई किलो गाँजासहित १५ जनालाई पक्राउ गरेको ब्युरोका प्रमुख एवम् वरिष्ठ प्रहरी उपरीक्षक विकास खनालले जानकारी गराउनु भयो । खनालका अनुसार प्रतिबन्धित लागुऔषधको बजार मूल्य २९ लाख ९९ हजार चार सय रुपैयाँ रहेको छ ।
