काम गरेको तलब नदिएपछि आठ लाख चोरी
भदौ,२९ काठमाडौं । कैलालीको धनगढी उपमहानगरपालिका–१८ फूलबारीका ३२ वर्षीय हिरा विकको घरबाट बरामद भएको आठ लाख भारतीय रुपैयाँ उनले भारतबाटै चोरेर ल्याएको खुलेको छ ।
पक्राउ परेका विकले भारतको मुम्बईस्थित आफूले काम गर्दै आएको घरका साहुले काम गरेको तलब नदिएपछि आठ लाख रकम चोरी गरेर ल्याएको स्वीकार गरेको प्रहरीले बताएको छ । जिल्ला प्रहरी कार्यालय कैलालीका प्रहरी नायब उपरीक्षक वेदप्रकाश जोशीका अनुसार लामो समयदेखि तलब नदिएको रिसमा रकम चोरेर हिँडेको हिराले बताए ।
विक सानै उमेरदेखि ती साहुको घरमा काम गर्दै आएको तर मासिक रूपमा पारिश्रमिक नदिने गरेको उनको भनाइ छ । विकविरुद्ध अभद्र व्यवहार सम्बन्धी कसुरमा मुद्दा चलाउँदै उक्त पैसा सम्बन्धित व्यक्तिलाई फिर्ता गर्ने तयारी भइरहेको डीएसपीले जानकारी दिनुभयो ।
