खोला तर्ने क्रममा बगेर दैलेखमा दुई जनाको मुत्यु
असोज,५ काठमाडौं । खोला तर्ने क्रममा बगेर दैलेखमा दुई जनाको ज्यान गएको छ । ज्यान गुमाउनेमा भैरवी गाउँपालिका २ का ४३ वर्षीय वीरबहादुर थापा र महाबु गाउँपालिका ३ का ४६ वर्षीय कृष्णबहादुर बुढा रहेका जिल्ला प्रहरी कार्यालय दैलेखका इन्चार्ज एवम् प्रहरी नायब उपरीक्षक (डीएसपी)भुवनेश्वरप्रसाद साहले बताउनु भयो ।
आज दिउँसो भैरवी गाउँपालिका २ मा छामघाट खोला तर्ने क्रममा दुवै जनालाई बगाएको थियो । दुवै जनाको शव भैरवी गाउँपालिका १ खोली बजार नजिकै छामघाट खोलाको झोलुङ्गे पुल नजिकै देखेपछि स्थानीयवासीले प्रहरीलाई खबर गरेका थिए । दुवै जनाको शव पोस्टमार्टमका लागि दैलेख जिल्ला अस्पताल लगिएको डीएसपी शाहले बताउनु भयो ।
