नर्थ लण्डन डार्बीमा १० खेलाडीमा सीमित टोटनहम हटस्पर्सलाई हराउँदै आर्सनलले इंग्लिस प्रिमियर लिगको शीर्ष स्थानमा आफ्नो पकड बलियो बनाएको छ । शनिबारको खेलमा आर्सनल ३–१ गोलले विजयी भएको हो ।

खेलमा राम्रो सुरुवात गरेको आर्सनलका लागि थोमस पार्टलेले खेलको २० औँ मिनेटमा गोल गर्दै अग्रता दिलाएका थिए । तर ३१ औँ मिनेटमा ह्यारी केनले पेनाल्टीमार्फत गोल गर्दै खेल बराबरीमा ल्याए । प्रिमियर लिगका अवे खेलमा उनको यो १ सयौँ गोल थियो ।

दोस्रो हाफमा गब्रियल जिसुसको गोलको मद्दतले आर्सनलले पुनः अग्रता लियो । ६२ औँ मिनेटमा एमर्सन रोयलले रातो कार्ड खाँदै मैदान छाड्न परेपछि स्पर्स थप दबाबमा पर्‍यो । यसको फाइदा उठाउँदै ग्रानिट जाकाले आर्सनलका लागि अर्को गोल थपे । ८ खेलपछि आर्सनल २१ अंकसहित शीर्ष स्थानमा रहेको छ । स्पर्स १७ अंकसहित लिगको तेस्रो स्थानमा छ ।एजेन्सी