फुल्चोकीमा हराएका ४ जना विद्यार्थीको ११ घण्टापछि उद्धार

कार्तिक,२७ काठमाडौं । ललितपुरको फुल्चोकीमा हराएका ४ जना विद्यार्थीको उद्धार भएको छ।
फुल्चोकीमा हराएका चार जना विद्यार्थीको ११ घण्टापछि उद्धार गरेको जिल्ला प्रहरी परिसर ललितपुरले बताएको छ ।
काठमाडौंको मुलपानीमा रहेको नेपाल राष्ट्रिय निर्माण माध्यमिक विद्यालय कक्षा ११ र १२ मा पढ्ने १२५ जना विद्यार्थी फुल्चोकीमा घुम्न गएका थिए।
हिजो दिउँसो करिब २ बजे फर्किने क्रममा उनीहरूमध्ये ४ जना विद्यार्थी हराएका थिए।
छोटो बाटो हिँड्न खोजेपछि उनीहरू जंगलमा हराएको प्रहरीले बताएको छ ।
शिक्षक र विद्यार्थीहरूले मिलेर खोज्दा पनि फेला नपरेपछि हिजो साँझ करिब ७ बजेतिर उनीहरूले प्रहरी प्रभाग बाडेगाउँमा खबर गरेका थिए।
खबर पाएपछि प्रहरी निरीक्षकसहित खटिएको २० जनाको टोलीले मध्यराति १ बजे उनीहरूलाई फेला पारेको परिसरले बताएको छ ।