कुटपिट गरी एक जनाको हत्या, ६जना पक्राउ

मंसिर,१६काठमाडौं । धनुषामा कुटपिट गरी एक जनाको हत्या भएको छ।
हिजो राति मिथिला बिहारी नगरपालिका-४ रमौल बस्ने ५३ वर्षीय प्रभु यादवको कुटपिट गरी हत्या भएको जिल्ला प्रहरी कार्यालय धनुषाले बताएको छ ।
उनको हत्या गरेको आरोपमा प्रहरीले ६ जनालाई पक्राउ गरेको छ।
प्रभु यादव र सोही ठाउँका सुरज यादवबीच जग्गा जमिनको विषयमा विवाद थियो।
त्यही विवादको क्रममा उनीमाथि कुटपिट भएको थियो। कुटपिटबाट गम्भीर घाइते भएका उनको उपचारका लागि प्रादेशिक अस्पताल जनकपुरमा लगिएको थियो।
त्यहीँ उपचारको क्रममा मृत्यु भएको हो।
प्रहरीले कुटपिटमा संलग्न सोही ठाउँ बस्ने २७ वर्षीय गणेश कुमार यादवसहित ६ जनालाई पक्राउ गरेको छ।