गुडिरहेको गाडीबाट खसेर एक महिलाको मृत्यु
जेठ,२० काठमाण्डौ । भक्तपुरमा गुडिरहेको गाडीबाट खसेर आज एक महिलाको ज्यान गएको छ । भक्तपुर नगरपालिका–१ सल्लाघारीको हनुमन्ते पुलमा राधेराधेबाट निकोसेरा जाँदै गरेको बा २१च ५३०१ नम्बरको गाडीबाट खसेर ४३ वर्षीया महिलाको मृत्यु भएको छ । मृत्यु हुने महिलाको परिचय खुल्न बाँकी रहेको जिल्ला प्रहरी परिसर भक्तपुरका प्रहरी उपरीक्षक प्रजित केसीले बताउनुभयो ।
गाडीबाट खसेर घाइते भएकी महिलाको सल्लाघारीको डा इवामुरा मेमोरियल अस्पतालमा उपचारका क्रममा मृत्यु भएको हो ।
गाडी चालक काभ्रे भुम्लु गाउँपालिका–३ घर भइ अहिले ललितपुर इमाडोल बस्ने ३० वर्षीय सूर्यबहादुर पहरीलाई पक्राउ गरिएको केसीले बताउनु भयो ।
