कांग्रेसको केन्द्रीय समिति बैठक आज पनि जारी
साउन,५ काठमाडौं । नेपाली कांग्रेसको केन्द्रीय समिति बैठक आज पनि जारी रहनेछ। सानेपामा बिहान ११ बजेदेखि सुरू हुने बैठकमा आज पनि केन्द्रीय सदस्यहरूले धारणा राख्ने छन् ।
उनीहरूले महामन्त्री विश्वप्रकाश शर्माले राखेको १० एजेन्डा, अर्का महामन्त्री गगन थापाले प्रस्तुत गरेको वार्षिक कार्ययोजना र अनुशासन समितिका संयोजक आनन्द ढुंगानाले पेश गरेको अनुशासन समितिको टिपोटमाथि केन्द्रीत रहेर आफ्नो धारणा र सुझाव प्रस्तुत गर्नेछन्।
मंगलबारदेखि सुरु भएको केन्द्रीय समिति बैठकमा अहिलेसम्म ८१ जना सदस्यहरूले धारणा राखेका छन्। सो क्रममा सभापति शेरबहादुर देउवाको कार्यशैलीको आलोचना र बचाउ गर्नेदेखि गठबन्धनका कारण परेका अप्ठ्योरोदेखि भूटानी शरणार्थी प्रकरणमा पक्राउ परेका नेता बालकृष्ण खाणसम्मका विषहरूमा धारणा राखेका थिए।
