कविता जोशीले एकै ओभरमा दुई विकेट लिएपछि खेलमा फर्कियाे नेपाल
एसिसी महिला प्रिमियर कप २०२४ को फाइनल प्रवेशका लागि भइरहेको खेलमा एकै ओभरमा चौथो र पाँचौँ विकेट गुमाएपछि मलेसिया गहिरो संकटमा देखिएको छ ।
महत्वपूर्ण साझेदारी गर्दै जिततर्फ लम्किरहेको मलेसियालाई कविता जोशीले एकै ओभरमा संकटमा पारिदिइन् । कविताले आफ्नो पहिलो स्पेलको तेस्रो बलमा महिराह इजाती इस्माइललाई पेभेलियन पठाइन् । सोही ओभरको अन्तिम बलमा महिराहको स्थानमा आएकी इन्टान जमहीदायूलाई शून्य रनको अवस्थामा आउट गरिन् ।
नेपालले दिएको एक सय १६ रनको लक्ष्य पछ्याइरहेको मलेसियाले १४.३ ओभरमा ७२ रनको अवस्थामा चौथो झड्का व्यहोरेको थियो । महिराहले २२ बल खेल्दै १६ बनाएकी थिइन् । आउट हुन अघिल्लो बलमा उनले कवितालाई चौका प्रहार गरेकी थिइन् ।लगत्तै आएकी इन्टानले जम्मा दुई बल खेलिन् र कुनै रन बनाइनन् । नयाँ पत्रिका
