चैत्र,२५ काठमाडौं । सिरहा नगरपालिकाको गुलरिया नजिकबाट अपरिचित समूहले पेस्तोल देखाएर मनी ट्रान्सफरको १५ लाख रुपैयाँ लुटेका छन्।आज अपराह्न १२ बजे पेस्तोलधारी समूहले मनी ट्रान्सफरका सञ्चालक पुरूषोत्तम यादवसँग १५ लाख रकम लुटेका छन् ।

सिरहाको विष्णुपुर बजारमा मनि ट्रान्सफर सञ्चालन गर्दै आएका यादव सिरहा स्थित ग्लोबल आईएमई बैङ्कबाट उक्त रकम झिकेर कार्यालय आउँदै थिए। उक्त रकम लिएर मोटरसाइकलमा जाँदै गरेका यादवलाई सिरहा-चोहर्वा सडकको गुलरिया नजिक भारतिय नम्बरको मोटरसाइकलमा आएका पेस्तोलधारी समूहले पेस्तोल देखाएर रकम लुटेर लगेको पीडितको बयानलाई उद्धृत गर्दै सिरहा प्रहरी प्रमुख एसपी सन्तोष आचार्यले बताए ।

सो समूहले रकम लुटेपछि यादव चढेको स ९ प ६३१० नम्बरको मोटरसाइकललाई सडकमै लडाएर भागेका थिए। यादवले उक्त रकम मोटरसाइकलको डिकीमा राखेको प्रहरीले बताएको छ ।