प्रमुख प्रतिपक्षी नेपाली कांग्रेसका सांसद प्रदीप पौडेलले नेपाल प्रहरीले विश्वसनीयता गुमाउँदै गइरहेको बताएका छन्।प्रतिनिधि सभाको मंगलबारको बैठकमा बोल्दै उनले गृह मन्त्रालयको नेतृत्वले भनेको कुनै पनि काम नहुने स्थिति बनेको पनि बताए।

सार्वजनिक जग्गादेखि लिएर सुशासन कायम गर्ने सन्दर्भमा गृह मन्त्रालयले स्पष्टता प्रस्तुत गर्न नसकेको उनको भनाइ छ।

‘यो विनियोजनले आर्थिक अनुशासनलाई पालना गरेको देखिँदैन। खासगरी मन्त्री र सरकारहरुको कारणले हाम्रो व्यवस्था र संघीयतामाथि सबभन्दा बढी टिकाटिप्पणी भइरहेको छ,’ उनले भने, ‘विगतका सरकारहरूका कारणले, मन्त्रीमण्डलमा बस्ने पात्रहरुका कारणले हाम्रो सुशासन खल्बल्लिएको छ। संघीयतामाथि प्रश्न उठेको छ र व्यवस्थामाथि प्रश्न उठेको स्थिति छ।’

उनले योजनाको छनौट कसरी भयो र के आधारमा बजेट विनियोजन भयो भन्ने प्रश्न पनि गरेका छन्।

‘प्रहरीले विश्वसनीयता गुमाउँदै गइरहेको छ। नेतृत्वले भनेका कुनै पनि काम नहुने स्थिति बनेको छ। गृह मन्त्रालयको पनि चालु खर्च १ अर्ब १० करोड वृद्धि भएको स्थिति छ,’ उनले भने, ‘सार्वजनिक जग्गादेखि लिएर सुशासन कायम गर्ने सन्दर्भमा गृह मन्त्रालयले जुन स्पष्टता प्रस्तुत गर्नुपर्ने हो त्यो स्पष्टता प्रस्तुत गरेको स्थिति छैन।’

(न्युज एजेन्सी नेपाल)