वीरगञ्जमा चापाकल सुक्न थाले, खानेपानीको लाइन जडान गर्ने बढे
![](https://www.yetikhabar.com/wp-content/uploads/2024/06/water_crisis_Frai88XW70.jpg)
पर्सा – वीरगञ्ज महानगर क्षेत्रमा चापाकल सुकेर खानेपानीको अभाव हुन थालेपछि सर्वसाधारणले खानेपानीको लाइन जडान गर्न थालेका छन् । चालू आर्थिक वर्षको साउनदेखि यही असार ६ गतेसम्मको अवधिमा मात्रै थप दुई हजार आठ सय १० घरधुरीले खानेपानी संस्थान शाखा कार्यालयबाट नयाँ धारा जडान गरेका हुन् ।
खानेपानी संस्थान शाखा कार्यालय वीरगञ्जका वितरण प्रमुख सञ्जीवकुमार यादवले सर्वसाधारणको घरआँगन परिसरमा जोडेको चापाकल सुकेसँगै खानेपानी संस्थानको धारा जोड्ने क्रम बढेको जानकारी दिनुभयो ।
गएको वर्षको असार मसान्तसम्म संस्थानका खानेपानीका ग्राहक आठ हजार चार सय जना मात्रै रहेका थिए । तर यो हिउँदेयाममा चर्काे खडेरी लागेसँगै खानेपानी संस्थानको लाइन जोड्नेको सङ्ख्या बढिरहेको छ । यस वर्ष यही असार ६ गतेसम्म संस्थानका खानेपानीका कूल ग्राहक सङ्ख्या ११ हजार दुई सय १० जना पुगेकाे छ । रासस