वर्षाको कारण गत २८ जेठयता देशका विभिन्न स्थानमा बाढीपहिरोलगायतका विपदमा परेर एक सय ७३ जनाले ज्यान गुमाएका छन्। 

बाढीपहिरोलगायतका विपदमा परी काठमाडौं उपत्यकामा तीनजना, कोशी प्रदेशमा २६ जना, मधेश प्रदेशमा सातजना, बागमती प्रदेशमा ३१ जना, गण्डकी प्रदेशमा ५४ जना, लुम्बिनी प्रदेशमा ३३ जना, कर्णाली प्रदेशमा आठजना र सुदूरपश्चिम प्रदेशमा ११ जना गरी एक सय ७३ जनाको मृत्यु भएको केन्द्रीय प्रहरी प्रवक्ता एवं प्रहरी नायब महानिरीक्षक दानबहादुर कार्कीले जानकारी दिए। 

उनका अनुसार काठमाडौं उपत्यकामा ११ जना, कोशी प्रदेशमा ३७ जना, मधेश प्रदेशमा ११ जना, बागमती प्रदेशमा २३ जना, गण्डकी प्रदेशमा ४६ जना, लुम्बिनी प्रदेशमा १३ जना, कर्णाली प्रदेशमा ५४ जना र सुदूरपश्चिम प्रदेशमा २८ जना गरी जम्मा दुई सय २३ जना घाइते भएका छन्। 

यसैगरी, बाढीपहिराका कारण काठमाडौं उपत्यकामा २८ जना, कोशी प्रदेशमा ४९ जना, बागमती प्रदेशमा १२ जना, गण्डकी प्रदेशमा १४ जना, लुम्बिनी प्रदेशमा तीनजना, कर्णाली प्रदेशमा दुईजना र सुदूरपश्चिम प्रदेशमा पाँचजना गरी एक सय १३ जनाको उद्धार गरिएको छ। 

कार्कीका अनुसार बाढीपहिरामा परी कोशी प्रदेशमा दुईजना, बागमती प्रदेशमा ४१ जना, गण्डकी प्रदेशमा दुईजना, लुम्बिनी प्रदेशमा एकजना, कर्णाली प्रदेशमा एकजना र सुदूरपश्चिम प्रदेशमा एकजना गरी ४८ जना बेपत्ता भएका छन्। 

बाढीका कारण जम्मा तीन सय ८४ घर डुबानमा परेका छन्। दुई सय ७५ वटा घर, एक सय चारवटा गोठ, ४३ वटा पुल, दुईवटा विद्यालय र दुईवटा सरकारी कार्यालयमा क्षति पुगेको प्रहरीले जनाएको छ। बाढीपहिराबाट आठ सय १२ वटा पशुचौपाया मरेका छन्। उक्त अवधिमा विपतका घटनाबाट चार हजार तीन सय २२ घरपरिवार विस्थापित भएका प्रवक्ता कार्कीले जानकारी दिए। (रासस)