भोटेकोशीमा खसेको गाडी चालकको शव भेटियो
असोज, १ काठमाडौं । भोटेकोशीमा बोलेरो गाडी खसेर बेपत्ता भएका चालकको शव भेटिएको छ। हिजोसाँझ सिन्धुली फिक्कल गाउँपालिका-६ सोखुखोला स्थित सुनकोशी नदीमा चालक ३५ वर्षीय सानु तामाङको शव भेटिएको सशस्त्र प्रहरीका सहप्रवक्ता शैलेन्द्र थापाले बताए ।
पोस्टमर्टमका लागि शव धुलिखेल अस्पताल पठाइएको छ, डिएसपी थापाले बताए । शुक्रबार दिउँसो बा २० च २१८५ नम्बरको बोलेरो गाडी बाह्रबिसे नगरपालिका वडा नम्बर ६ बरण्डा टोलस्थित सडकबाट गाडी भोटेकोशी नदीमा खसेको थियो।
बोलेरो गाडीमा सवार बाह्रबिसे नगरपालिका ९ की ३६ वर्षीया सुन्तली भनिने सुनिता तामाङको शव शनिबार भेटिएको थियो। उनको शव सिन्धुपाल्चोक त्रिपुरासुन्दरी गाउँपालिका ६ स्थित सुनकोशी जलविद्युत केन्द्रको ड्याम साइट नजिकै फेला परेको हो।
