तराईका विभिन्न ठाउँमा आज पनि बाक्लो हुस्सु र कुहिरो
माघ, ४ काठमाण्डौ । तराईका विभिन्न ठाउँमा आज पनि बाक्लो हुस्सु र कुहिरो लागेको छ । बाग्मती र गण्डकी प्रदेशको तराईमा लागेको हुस्सु र कुहिरो दिउँसोसम्ममा क्रमिक रुपमा सुधार हुने मौसम पूर्वानुमान महाशाखाले बताएको छ ।
महाशाखाका अनुसार कोशी, मधेश र लुम्बिनी प्रदेशको तराईका धेरै ठाउँमा लागेको हुस्सु र कुहिरो मध्यान्नपछि मात्रै हट्दै जानेछ । केही दिनयता पूर्वी र मध्य तराईमा दिनभरजसो हुस्सु र कुहिरो लाग्ने गरेको छ । बाक्लो हुस्सु र कुहिरोले तराईको जनजीवन कष्टकर बन्दै आएको छ ।
आज अरु ठाउँको मौसम भने मुख्यतया सफा रहेको छ । काठमाण्डौ उपत्यकासहित पहाडी क्षेत्रमा मौसम आंशिक बदली भएको छ । सुदूरपश्चिम, कर्णाली र लुम्बिनीका केही ठाउँमा हिजो हल्का वर्षा र हिमपात भएको थियो ।
