बबरमहलमा मेलम्चीको पाइप फुट्दा ३० लाख लिटर पानी खेर
फागुन, १ काठमाण्डौ । नेपाल विद्युत् प्राधिकरणको भूमिगत लाइन विस्तारका क्रममा बुधबार बबरमहलमा मेलम्ची खानेपानीको पाइप फुट्दा ३० लाख लिटर पानी सडकमा बगेर खेर गएको छ ।
काठमाण्डौ उपत्यका खानेपानी लिमिटेड(केयूकेएल) का अनुसार करिब ४ घण्टा पाइपबाट लगातार पानी खेर गएको छ । २० इन्चको पाइप फुटेर पानी बग्दा बबरमहलको सडक, सरकारी कार्यालय र निजी घरहरु जगलमग्न भएको थियो ।
केयूकेएलका अनुसार मेलम्चीबाट ल्याइएको पानी सुन्दीजलको प्रशोधन केन्द्रबाट थोक वितरण प्रणालीमा पठाइएको ७५ किलोमिटर पाइप लाइनमा रहेको सबै पानी बबरमहल क्षेत्रमा बगेको छ । आज बेलुकीसम्म क्षतिग्रस्त पाइप मर्मत गरेर पानी वितरण गर्ने तयारी भइरहेको केयूकेएलले बताएको छ ।
