पर्सा – पथलैया औद्योगिक कोरिडोरमा सञ्चालित म्याग्नस फर्माले एक अर्ब रुपैयाँ लगानी बढाएर ‘इन्जेक्टेबल’ औषधि पनि उत्पादन गर्ने भएको छ ।

कम्पनीले ‘भाइल’ तथा ‘ड्रप’ हरू उत्पादन गर्न आवश्यक उपकरण जडान एवम् परीक्षण गरिहेको तथा आउँदो वैशाखदेखि पूर्ण क्षमतामा काम गरी नयाँ औषधि बनाइने फर्माका प्रबन्ध निर्देशक सुधिरप्रकाश मास्केले बताउनुभयो ।

उद्योगमा थपिएको नयाँ ‘इन्जेक्टेबल प्लान्ट’ बाट औषधिका भाइल र एम्पुलको उत्पादनका साथसाथै आँखा, नाक र कानमा प्रयोग हुने ड्रप पनि बनाउने उहाँले बताउनुभयो ।

उहाँका अनुसार कम्पनीले एक सयभन्दा धेरै औषधि उत्पादन गर्न सक्ने प्लान्ट स्थापना गरे पनि अहिलेसम्म २० प्रकारका औषधि मात्र उत्पादनको अनुमति रहेको छ । यसैबीच कम्पनीमा तीन सय ५० भन्दा बढीले प्रत्यक्ष रोजगारी पाएका छन् ।

गएको आर्थिक वर्षमा  एक अर्ब २६ करोड रुपैयाँ मूल्य बराबरको कारोबार गरेको कम्पनीले चालू आर्थिक वर्षमा एक अर्ब ४० करोड रुपैयाँको कारोबार गर्ने लक्ष्य लिएको छ ।रासस