फागुन, २५ काठमाडौं । राष्ट्रिय प्रजातन्त्र पार्टीसहित राजावादी संगठनहरूले पूर्वराजा ज्ञानेन्द्र शाह पोखराबाट काठमाडौँ आउने अवसर पारेर काठमाडौँमा शक्ति प्रदर्शनको तयारी गरेका छन्।

आज काठमाडौँका विभिन्न स्थानबाट जुलुस निकालेर त्रिभुवन अन्तर्राष्ट्रिय विमानस्थलमा भेला भई शाहको स्वागत गर्दै शक्ति प्रदर्शनको तयारी गरेका हुन्। पोखराबाट फर्किएपछि ज्ञानेन्द्रलाई जुलुससहित चक्रपथ हुँदै महाराजगञ्जस्थित निर्मल निवास लैजाने उनीहरूको तयारी रहेको छ।

यसैबीच स्थानीय प्रशासनले काठमाडौँमा बिहानैदेखि सुरक्षा सतर्कता बढाएको छ। पूर्वराजाको स्वागतमा करिब १० हजार सहभागी हुनसक्ने गृहको आंकलन रहेको छ। प्रदर्शनलाई मध्यनजर गरी काठमाडौँमा सुरक्षाकर्मीलाई ‘हाई अलर्ट’मा राखिएको प्रहरीले बताएको छ ।

आज बिहानैदेखि काठमाडौँका संवेदनशील पहिचान गरिएका क्षेत्र र मुख्य चोकमा सुरक्षाकर्मीको तैनाथी बढाइएको छ भने चोकचोकमा बर्दीसहित र सादा पोशाकका प्रहरी टोली परिचालन गरिएको छ।