फागुन, २७ काठमाण्डौ । प्रधानमन्त्री केपी शर्मा ओलीले आज कोशी प्रदेशसभामा विशेष सम्बोधन गर्दै हुनुहुन्छ । दिउँसो २ बजे बस्ने प्रदेशसभा बैठकमा प्रधानमन्त्री ओलीले सम्बोधन गर्ने कार्यक्रम तय भएको प्रदेशसभा सचिवलायले बताएको छ ।

प्रधानमन्त्री ओलीको सम्बोधन सुन्नका लागि सत्तारूढ दलहरू नेकपा एमाले र नेपाली कांग्रेसले आफ्ना सांसदहरूलाई ह्विप जारी गरेका छन् । एमालेले हिजो संसदीय दलको बैठकमार्फत सबै ४० जना सांसदलाई अनिवार्य रूपमा उपस्थित हुन निर्देशन दिएको थियो ।

नेपाली कांग्रेसले पनि आफ्ना २९ जना सांसदलाई बैठकमा उपस्थित हुन निर्देशन दिइसकेको छ । प्रमुख सचेतक गोपाल तामाङका अनुसार प्रधानमन्त्रीको सम्बोधनलाई मध्यनजर गर्दै कांग्रेसले ह्विप जारी गरेको हो ।

विपक्षी दलहरूले भने प्रधानमन्त्रीको सम्बोधन बहिष्कार गर्ने चेतावनी दिएका छन् । सरकारले संसद्मा उठाइएका विषयहरू सम्बोधन गर्न असफल भएको र संसद्लाई पेलेर अघि बढ्न खोजेको उनीहरूले आरोप लगाएका छन् ।