पौडी खेल्न गएका २ बालक बेपत्ता
बैशाख, ३ काठमाडौं । पौडी खेल्न नारायणी नदीमा गएका पूर्वी नवलपरासीको मध्यविन्दु नगरपालिकाका एउटै घरका २ जना बालक बेपत्ता भएका छन्। हिजो दिउँसो पौडी खेल्न गएका ५ जनामध्ये मध्यविन्दु १२ तमासपुरका धनन्जय पौडेलका छोरा १६ वर्षीय विजय र हरि पौडेलका छोरा १२ वर्षीय पवन बेपत्ता भएको वडाध्यक्ष कान्ताप्रसाद कुमालले बताउनुभयो ।
बेपत्ता भएका बालकहरु एउटै परिवारका २ भाइका छोरा हुन्। विजयले हालै मात्र एसईई परीक्षा दिएका थिए। घरबाट २ किलोमिटर टाढा मध्यविन्दु नगरपालिका– १५ को सीमा क्षेत्रमा पर्ने अरुणखोला र नारायणी नदीको संगमस्थल सशलाघाटमा उनीहरु पौडी खेल्न गएका थिए। उनीहरु बेपत्ता भएको जानकारी साँझ साढे ६ बजेतिर पाएपछि स्थानीयले प्रहरीलाई खबर गरेका थिए।
