कागतीको मूल्य बढ्यो होलसेल मूल्य नै प्रतिकिलो ४२५ रुपैयाँ
काठमाडौं २६ चैत । भारतीय बजारमा कागतीको मूल्य बढेसँगै नेपाली बजारमा पनि कागतीको मूल्य उकालो लाग्न थालेको छ । भारतमा कागतीको मूल्यमा ठूलो वृद्धिसँगै आयातबाटै माग धानिँदै आएको नेपाली बजारमा पनि मूल्य बढ्न थालेको हो ।
कालिमाटी फलफुल तथा तरकारी बजार विकास समितिका अनुसार यही चैत १८ गते प्रतिकिलो २७५ रुपैयाँ होलसेल मूल्यमा बिक्री भइरहेको थियो । समितिका अनुसार आज कागतीको होलसेल मूल्य प्रतिकिलो ४२५ रुपैयाँ छ । भारतमा यसको मूल्य बढिरहँदा आयातबाट माग धान्ने नेपाली बजारमा समेत मूल्यवृद्धिको असर देखिन थालेको हो । भारतमा गर्मी बढ्न थालेसँगै कागतीको मागमा उछाल आएको छ ।
होलसेल बजारमा ४२५ रुपैयाँ प्रति किलोमा बिक्री भइरहेको कागतीको मूल्य खुद्रा बजारमा ५५० रुपैयाँसम्म पुगेको छ ।
