जेठ,२३ काठमाडौं । काठमाडौंको चाबहिलनजिकै सरस्वतीनगरमा आगलागीबाट पाँच जना घाइते भएका छन्। हिजो बेलुकी पौने ९ बजे काठमाडौं महानगरपालिका वडा नम्बर ७ सरस्वतीनगर गोपिकृष्ण चलचित्र हलनजिकै घरमा आगलागी हुँदा पाँच जना घाइते भएको जिल्ला प्रहरी परिसर काठमाडौंका एसपी नवराज अधिकारीले बताए ।

आगलागी भएको भन्ने खबर पाएपछि प्रहरी सहायक निरीक्षक रामबाबु कुशवाहको कमाण्डमा प्रहरीको टोली खटिएको थियो। तीन तले घरको तेस्रो तलामा बस्दै आएका ५५ वर्षीय चन्चलबहादुर सिंहले अत्याधिक मापसे गरी श्रीमतीसँग झगडा गरेको प्रहरीले बताएको छ ।

त्यसैबीच उनले कोठामा पेट्रोल छर्किएर आगलागी गरेको प्रारम्भिक अनुसन्धानमा खुलेको छ। आगलागी हुँदा उनीसहित उनकी ४४ वर्षीया श्रीमती बिन्दु सिंह, जेठी छोरी २४ वर्षीया सुप्रिया, माइली छोरी १६ वर्षीया समृद्धि र ८ वर्षीया कान्छी छोरी सुहानी घाइते छन्। घाइते भएका उनीहरूको उपचारका लागि हेल्पिङ ह्याण्ड्स अस्पताल लगिएको थियो।