बाँकेमा बाघको आक्रमणबाट एक वृद्धाको मृत्यु
माघ, १० काठमाडौं । बाघको आक्रमणबाट बाँकेमा एक वृद्धाको मृत्यु भएको छ। बाँकेको राप्ती सोनारी गाउँपालिका–८ सम्शेरगन्जस्थित ओभरीमा रहेको भगवती सामुदायिक वन उपभोक्ता समूहको जंगलमा दाउरा काट्न गएकी स्थानीय ६७ वर्षीया चेती बुढाको बाघको आक्रमणबाट मृत्यु भएको छ।
कोहलपुर इलाका प्रहरी कार्यालयका अनुसार हिजो बिहान करिब ११ बजेतिर उनी दाउरा काट्न भन्दै घरबाट निस्केकी थिइन्। घरबाट करिब २ किलोमिटर टाढा रहेको सामुदायिक वन समूहको जंगलभित्र दिउँसो बाघले आक्रमण गरेर उनलाई मारेको थियो।
स्थानीयका अनुसार खोजीका क्रममा उनको शव साढे ३ बजेतिर फेला परेको थियो। मृतकको शवलाई पोष्टमार्टमका लागि भेरी अस्पताल नेपालगन्जमा राखिएको प्रहरीले बताएको छ ।
