प्रतितोला १ हजार ८ सय रुपैयाँले बढ्यो सुनको मूल्य
१९ चैत, काठमाडौं । लगातार चार दिनदेखि सुनको मूल्यमा रेकर्ड बन्ने क्रम जारी छ । आज पनि सुनको मूल्य हालसम्मकै उच्च भएको छ । नेपाल सुनचाँदी व्यवसायी महासंघले यस दिन भाउ प्रतितोला १ लाख ७९ हजार ७ सय रुपैयाँ तोकेको छ । आजको मूल्य हिजोको तुलनामा १८ सय बढी हो ।
हिजो प्रतितोला १ लाख ७७ हजार ९ सय रुपैयाँमा सुनको कारोबार भएको थियो । गत शुक्रबारदेखि सुनको मूल्यले दैनिक नयाँ रेकर्ड बनाउँदै आएको छ । शुक्रबार प्रतितोला १ लाख ७६ हजार २ सयमा कारोबार भएको सुन आइतबार १ लाख ७६ हजार ८ सय पुग्यो ।
सोमबार ११ सय बढेर १ लाख ७७ हजार ९ सय पुगेको थियो । आज भने १ लाख ७९ हजार ७०० रुपैयाँ कायम भएको छ । यस्तै चाँदीको मूल्य भने स्थिर रहेको छ ।
